අඛන්ඩ සාම්‍රාජ් යෝගය

ॐ गुरुवे नमः

 ඕම් ගුරුවේ නමඃ  

 යෝගයේ යෙදීම

දුර්ලබව පිහිටන යෝගයක් ලෙස මෙම යෝගය හැඳින්විය හැක. මෙම යෝගය පිහිටීමට නම් ගුරු ග්‍රහයා හඳහනේ පස්වන හෝ එකොලොස්වන භාවය අධිපතියෙක් විය යුතුය වෙනත් විදිහකින් පවසනවානම් ජන්මියා වෘෂභ, සිංහ, වෘෂ්චික හෝ කුම්භ යන රාෂියකින් උපන් කෙනෙක් විය යුතුය. (පෙර ලිපියකදි මෙම රාෂි හතර ස්තිර රාෂි හෙවත් තිර රාෂි විදිහට අපි හැඳින් වුවා ඔබට මතක ඇති.) ඉතින් මේ ගුරු ග්‍රහයා පස්වන හෝ එකොලොස්වන භාවයේ හිමිකරුවා වනවා සේම ඔහු යහපත් තත්වයකින් හඳහනේ තැම්පත් විය යුතුය. 

එපමනක් නොව.. දෙවැන්න (ධනස්ථානය.) නමවැන්න (පුන්‍යස්ථානය.) හා එකොලොස්වැන්න (අයස්ථානය.) යන ස්ථාන තුනේ අධිපතියන් බලවත්වත් සඳුගෙන් කේන්ද්‍ර ගතවත් තැම්පත්විය යුතුය.

යෝගයේ ප්‍රථිපල

මේ සියළුම අවශ්‍යතා සම්පුර්න වූ විට පමනක් ඔබට අඛන්ඩ සාම්‍රාජ් යෝගය යෙදෙනු ඇත. මෙය නමේ හැටියටම බලවත් යෝගයකි, අඛන්ඩ යනු බිඳ හෙලිය  නොහැකි දිගුකල් පවතින වැනි අදහසකි. සාම්‍රාජ් යනු රජුන්ගෙත් රජු වැනි අදහසකි... මේ යෝගය යෙදෙන තැනැත්තාට ධනය, බලය, දැණුම, සමාජ තත්වය හා දරුවන්ගෙන් ලැබීම් යන සියල්ල ලැබෙනු ඇති බව පොතපතේ සඳහන්ය. මීට අමතරව මෙම යෝගයෙන් උපන් තැනැත්තාට සූදුවෙන් හා කොටස් වෙලඳපොල ආදියෙන්ද ලැබීම් ඇති බව පුද්ගලික අත්දැකීම් තුලින් පැවසිය හැක.

පහත තිබෙන්නේ ඉන්දියාවේ තවමත් සුපිරි නළුවෙක් ලෙස සැලකෙන අමිතාබ් භච්චන්ගේ හඳහනේ මෙම යෝගය යෙදී ඇති ආකාරයයි. ඔහු කුම්භ ලග්නයෙන් ඉපදී ඇති අතර හඳනේ එකොලොස්වන භාවය ගුරුට අයිතිය, ගුරු උච්ච බලයෙන් තැම්පත් අතර ගුරුටම දෙවන භාවයද අයිතිය. මෙම ගුරු චන්ද්‍රයාට කේන්ද්‍රගතවද තැම්පත් වී ඇත. ඒ අනුව අඛන්ඩ සම්‍රාජ් යෝගය මෙම හඳහනේ සටහන්ය. යෝගයෙ අඛන්ඩ යන වචනය යෙදෙන්නේ ඇයි දැයි තවත් පැහැදිලි කර දීම අවශ්‍ය නොවනු ඇත. අමිතාබ් අදටත් රජෙකි.

පල දෙන කාලය

මෙම යෝගය ගුරු මහා දසාව හා අනෙක් මහා දසා වල ගුරුගේ අතුරු දසා යන කාල වලදීද, සඳුගේ හා ගුරු හා සංයෝග ග්‍රහයන්ගේ දසා වල යම් ප්‍රමාන වශයෙන්ද ප්‍රථිපල දෙනු ලබන අතර නාඩි සිද්ධාන්ත වලට අනුව ගුරුගේ ජීව හා ශරිර ග්‍රහයන්ගේ කාල තූලද යම් තරමකට පල දෙනු ඇත. (නාඩි සිද්ධාන්ත සම්භන්ධව ඉදිරියේදි සාකච්චා කරමු.)

වෛදික ජ්‍යෝතිෂවේදි

ධනුෂ්ක අබේරත්න

ජ්‍යෝතිෂ් භාෂ්කර් (ඉන්දියා)

0755004166

කේමදෘම දෝශය -කල්පදෘම කියන්නෙත් මේකමද? මේක ඇත්තටම අවුල්ද?

ॐ गुरुवे नमः

 ඕම් ගුරුවේ නමඃ  

          පලාපල කථනයේදි ගොඩක් වෙලාවට කියවෙන දෝශයක් තමයි මේ කේමදෘම දොෂය එහෙම ඇත්තන් කේමදෘම ‍යෝගය කියලා කියන්නේ.එතකොට කල්පදෘම යෝගය කියන්නෙත් මේකටමද? නෑ... නම් දෙක ලඟින් ගියාට කල්පදෘම එහෙම නැත්තන් පාරිජාත යෝගය කියන්නේ වෙනම එකක්. අපි කල්පදෘමයෝගය ගැන වෙනම දවසක කතා කරමු. එතකොට කොහොමද මේ කේමදෘම දෝෂය හඳහනේ යෙදෙන්නේ.

හඳහනේ සඳු තැම්පත් වෙලා ඉන්න තැනින් දෙප්ත්තේ කොටු දෙකේ හෝ සඳු තැම්පත් කොටුවේ කිසිම ග්‍රහයෙක් තැම්පත් නොවීම මගින් තමයි මේ දෝෂය යෙදෙන්නේ. ඒ වගේම රවි, රාහු හෝ කේතු තැම්පත් වුනත් ඒ තුන්දෙනාව නොසලකා හරිනවා. ඒ කියන්නේ සඳු දෙපස. හෝ සඳු සමග කුජ බුද ගුරු සිකුරු හෝ ශනි කියන ග්‍රහයින්ගෙන් එක්කෙනෙක්වත් නැතිනම් මේ දෝශය යෙදෙනවා.කේන්ද්‍රස්ථාන වල මෙම යෝගය යෙදුනම දෝෂ තත්වය වැඩියෙන් බලපාන බවක් තමයි සඳහන් වෙන්නේ.

පොදු මතය

මේ යෝගය ගැන පොදු මතය වෙන්නේ මෙම යෝගය සහිතව උපන් තැනැත්තා ධන සම්පත් හීන මිතුරන්ගේ උපකාර නැති, අනුන් යටතෙ සිටින්නට වෙන දුක්ඛිත ජීවිතයක් ගෙවන කෙනෙක් බවයි.

මේ යෝගය සඳහා උදාහරන ලෙස බිල්ගේට්ස්, කිම් ක(ර්)ඩෙශියන්, රාජෙෂ් කන්නා, මා ඕ සේතුන්, සූසන් බොයිල් වගේ පුද්ගලයන්ව හඳුන්වා දෙන්න පුලුවන්.

බිල් ගේට්ස්ගේ හඳහන

28 October 1955 at 22:00 (= 10:00 PM ) Seattle, Washington, 47n36, 122w20
Timezone PST h8w (is standard time)

        පොඩ්ඩක් ඉන්න මේ අය හැමෝම මුදල් තිබුන/තියෙන බලවත් අයනේ. එතකොට මේ යෝගය තියන අය දුගි අසාර්ථක අය කියලනේ කිව්වේ? 

        අන්න එතන තමයි කතන්දරය තියෙන්නෙ. මේ කේමදෘම යෝගය ඇත්තටම බලපාන්නේ වැඩිපුරම අවුරුදු 18ට කලින් ඊට පස්සෙ ක්‍රමයෙන් මෙකේ බලපෑම අඩු වෙලා ගිහින් 42 වෙනකොට මේක අඩුම වෙලා යනවා. නමුත් මේ ගැන හරි දැනුමක් නැති සමහර අය පලාපල කථනයේදි අවුරුදු 30, 35 අයටත් මේ යෝගය නිසා අපල තියෙනවා කියලා කියනවා.

        වේදිය ජ්‍යෝතිෂය තුල මේ වගෙ වැරදියට අල්ලගත්ත දේවල් සෑහෙන්න තියෙනවා අපි තවත් ලිපියකින් ඒ වගේ තවත් අවස්ථාවක් ගැන සාකච්ඡා කරමු..

වෛදික ජ්‍යෝතිෂවේදි

ධනුෂ්ක අබේරත්න

ජ්‍යෝතිෂ් භාෂ්කර් (ඉන්දියා)

0755004166

විවාහය පමා වෙලාද? (බලගතු කට්‍යායනී මන්ත්‍රය.)

ॐ गुरुवे नमः

 ඔම් ගුරුවේ නමඃ

            ඔන්න අද අපි කතා කරන්න යන්නෙ විවහය පමා වුන අයට ඒ වෙනුවෙන් කරන්න පුලුවන් ප්‍රථිකර්මයක්, එහෙමත් නැත්තන් ඒ වෙනුවෙන් බාවිතා කරන්න පුලුවන් මන්ත්‍රයක් ගැන.

            මේ මන්ත්‍රය ගැන මුලින්ම සඳහන් වෙන්නේ භගවත් පුරානයේ. ප්‍රේම සම්බන්දතා වලට තියන බාධක ඉවත් කරගන්න, ඒ වගෙම තමන්ට ගැලපෙන සහකරුවකු හමුවෙන්න මේ මන්ත්‍රය භාවිතා කරන්න පුලුවන්. විශේෂයෙන්ම කුජ දෝෂ නිසා විවාහය පමා වෙනවනම් ඒ වෙනුවෙන් භාවිතයට සුදුසුම මන්ත්‍රයක් විදිහට මේ මන්ත්‍රය හඳුන්වන්නත් පුලුවන් 

            මේ මන්ත්‍රය තමන්ගෙ දියනියකගේ විවාහය පතා මවකට වුවද සජ්ජායනා කරන්න පුලුවන්. ඒ විතරක් නෙමෙයි නෙමෙයි මේ මන්ත්‍රය නිසා ජීවිතයේ අනෙක් බාධකත් දුරු වෙලා සැනසීම උදාවෙන බව පැවසෙනවා.

            දුර්ගා මෑනියන්ගේ සයවෙනි අවතාරය ලෙස තමයි කට්‍යායනී මාතාව සලකන්නේ. ඔය උඩ තියෙන පින්තූරය කට්‍යායනී මෑනියන්ගේ. කට්‍යායනී මෑනියන්ව සිතේ තියාගෙන එතුමියට පහනක් පත්තු කරලා, රතු වස්ත්‍රයෙන් සැරසිලා රතු මල් පූජා කරලා, රතු ආසනයක (රතු රෙද්දක් බිම එලා ගත්තත් ගැටලුවක් නැත ) වාඩිවෙලා තමයි මේ මන්ත්‍රය සජ්ජායනා කරන්න ඕන. දිනකට අවම වශයෙන් මාලා එකක් (108 වතාවක්) මේ මන්ත්‍රය සජ්ජායනා කරන්න ඕන.

මන්ත්‍රය:

कात्यायनि महामाये महायोगिन्यधीश्वरि । नन्द गोपसुतं देविपतिं मे कुरु ते नमः ।।

කට්‍යායනී මහාමායේ මහායෝගින්‍යධීශ්වරි නන්දගෝපසුතම් දේවි පතිම් මේ කුරු තේ නමඃ

තවත් ලිපියකින් මුනගැහෙනකන් ඔබට ජය...

වෛදික ජ්‍යෝතිෂවේදි

ධනුෂ්ක අබේරත්න

ජ්‍යෝතිෂ් භාෂ්කර් (ඉන්දියා)

0755004166

මහා භාග්‍ය යෝගය.

නම කිව්වම නමේ තේරුම අමුතුවෙන් පැහැදිලි කරන්න අවශ්‍ය නොවෙන යෝගයක් තමයි මේ මහා භාග්‍ය යෝගය. ඉතින් මේ යෝගය යෙදෙන්නේ කොහොමද? 
මේ යෝගය ස්ත්‍රී පාර්ශවයට යෙදෙන විදිහත් පුරුෂ පාර්ශවයට යෙදෙන විදිහත් එකිනෙකට වෙනස්. 
            පුරුෂ පාර්ශවයට නම් පලවෙනියටම ඒ අදාල පුරුෂයා දහවල් කාලයේ උපන් කෙනෙක් වෙන්න ඕන.(දහවල් කියලා ජ්‍යොතිෂයේදි හඳුන්වන්නේ ඉර උදාවත් ඉර බැසීමත් අතර කාලය) ඒ වගේම එයාගේ හඳහනේ රවි සහ චන්ද්‍රයා ඔත්තේ රාශි වල (මේෂ මිතුන සිංහ..etc. මේ ආකාරයට) තැම්පත් වෙන්නත් ඕන. ඊට අමතර ඒ කෙනා උපන් ලග්නයත් ඔත්තේ රාශියක් වෙන්න ඕන. මෙන්න මේ විදිහට සියලුම අවශ්‍යතාවයන් සම්පූර්නව පුරුෂයෙක් උපන්නොත් ඒ පුරුෂයා මහා භාග්‍ය යෝගයෙන් උපන්නා වෙනවා..
            එතකොට මේ යෝගය කාන්තාවකට පිහිටන්නේ කොහොමද? කාන්තාවක් නම් රාත්‍රි කාලයේ (යම් දිනක ඉර බැසීමේ සිට පසු දින ඉර උදාව දක්වා කාලය) ඉපදිලා ඒ කෙනාගෙ රවි සහ චන්ද්‍රයා ඉරට්ටේ රාශිවල තැම්පත් වෙලා ඒ වගේම එයාගේ ලග්නයත් ඉරට්ටේ රාශියකම වුනොත් (ඉරට්ටෙ රාශි කියන්නෙ ව්ෘෂභ කටක කන්‍යා ආදි වශයෙන්) ඒ කෙනා මහා භාග්‍ය යෝගයෙන් උපන් කෙනෙක් වශයෙන් සලකනවා.

එතකොට මේ යෝගයෙන් උපන් අයට ලැබෙන්නේ මොනාද?

            මේ යෝග‍යෙන් උපන් අය අන් අයගේ ආදරයට ප්‍රාප්ත වෙන කඩිසර ඒ ජීවිතය ගැන පුළුල් දැක්මක් තියන අය. ඒ වගේම ඔවුන්ට දරුවන්ගෙන් සැලකුම් ලැබීමටත් දෙමාපියන්ගෙන් (විෂෙශයෙන් මවුගෙන්) උපකාර ලැබීමටත් වාසනාව තිබෙනවා. එපමනක් නෙමෙයි යානවාහන ගේදොර ලැබීමටත් වාසනාව ලැබෙනවා.

විෂේශ

            මේ යෝගය සැකසීමට මූලික වන රවි සහ චන්ද්‍රයාගෙ උච්ච නීච ස්වාභාවය මේ යෝගයේ පල අඩු වැඩි කිරීමට හෙතු වෙනවා වගේම ඊට එල්ල වෙන ශුභ අශුභ ග්‍රහ ද්ෘෂ්ඨිත් මේ යෝගයේ පල අඩු වැඩි කිරීමට බලපානවා.
මේ යෝගය මූලික වශයෙන් රවිගෙ හා සඳුගේ මහා දසා අන්තර් දසා කාලවල පලදෙන අතර රවි හා සඳු නැකැත් අදිපතියන් වෙන ග්‍රහයන්ගෙ දසා කාල වලත් යම් මට්ටමකට ප්‍රතිපල ලබා දෙන බව සඳහන්. 

වෛදික ජ්‍යෝතිෂවේදි 
ධනුෂ්ක අබේරත්න
ජ්‍යෝතිෂ් භාෂ්කර් (ඉන්දියා)
0755 004 166

දවසේ සතියේ පලාපල හරිද?

 හරියටම අවුරුදු 5ක් මෙ බ්ලොග් එකට අන්තිම ලිපිය ලියලා.. ඇත්තටම මම හිතුවා මාස පහක් හයක් යනකොට බ්ලොග් එක එහෙම්මම යට ගිහින් මිනිස්සුන්ට මෙහෙම ජ්‍යොතිර්වේදියෙක් හිටියා කියන එකත් එහෙම්මම අමතක වෙලා යයි කියලා. නමුත් අවුරුදු පහක නිහැඬියාවකට පස්සෙත් බ්ලොග් එකට ලැබෙන ප්‍රතිචාර හා එන දුරකථන ඇමතුම් අවසන් වුනේ නෑ. ගොඩක් දෙනාගේ ඉල්ලිම වුනේ ආයෙත් හඳහන් බලන්න පටන් ගන්න ආයෙත් ලියන්න පටන්ගන්න ආයෙත් පංති පටන් ගන්න කියන එක.  සෑහෙන්න හිතලා ඔන්න ආයෙත් ලියන්න හඳහන් බලන්න වගේම ඉදිරි කාලයේදි ආයෙත් පංතියත් (අගස්ත්‍ය පාඨමාලාව.) පටන් ගන්නත් තීරනය කලා.

හරි ඒ කතාව පැත්තකින් තියලා අපි අද මාතෘකාවට බහිමු.  

සාමාන්‍යයෙන් අපේ උපන් කේන්ද්‍රය කියන්නේ අපි ඉපදෙන මොහොතේ ග්‍රහයන්ගේ පිහිටීම. නමුත් ඊට පස්සේ ග්‍රහයන් එතන නවතින්නේ නෑනේ. ඒවා සුපුරුදු ලෙසම ගමනේ යනවා. මේ ග්‍රහයන් මෙහෙම එක එක කොටුවෙන් කොටුවට (භාවයෙන් භාවයට.) ගමන් කරන එකට අපි කියනවා ග්‍රහයන්ගේ ගෝචර ගමන කියලා. උපන් කේන්ද්‍රය වගෙම මේකත් අපේ ජීවිතයට බලපානවා. 

එතකොට කොහොමද මේ දවසේ සතියේ පලාපල කියන්නේ?

දවසේ පලාපල කියන්නේ චන්ද්‍රයාගේ ගෝචර ගමන මුල් කරගෙන. චන්ද්‍රයා හඳහනේ එක කොටුවක (එක භාවයක,) ඉඳලා තවත් කොටුවකට යන්න දවස් එකහමාරක කාලයක් තමයි යන්නේ. සාමා‍යයෙන් ගත්තම මේක තමයි ග්‍රහයන්ගෙ කුඩා කාලයකදී වෙන ප්‍රධාන වෙනස. ඉතින් මේ නිසා චන්ද්‍රයා එක රාශියකින් තව එකකට ගියාම ඒ තැන චන්ද්‍රයාට කොහොමද කියලා ඒ ඒ ලග්නය අනුව බලලා පලාපල විස්තරයක් කියන එක තමයි මේ දිනපතා සතිපතා පලාපල කියනවා කියලා කරන්නේ.

එතකොට මොකක්ද මේකේ අවුල?

අවුල තමයි පලාපලයක් කියන්න ඒ විස්තරය විතරක් ප්‍රමානවත් නැති එක. ජ්‍යෝතිශයට අනුව නිවැරදි පලාපලයක් කියන්න නම් ඒ පුද්ගලයගෙ උප්පත්තියෙන් ග්‍රහ පිහිටිම දැනගැනීම අනිවාර්‍යයි. මොකද ඒක තමයි අත්තිවාරම. ඒ වගේම ඒ පුද්ගලයා ගත කරන දසාව මොකක්ද කියන එකත් අනිවාර්යයි. මේ දෙකම නැතිව චන්ද්‍රයා ගෝචර වෙන විදිහ දිහා විතරක් බලලා පලාපල කියනවා කියන්නේ අර අන්ධයෝ ටික අලියා ගැන විස්තර කිව්වා වගේ වැඩක්. 

ඇත්තටම මේ දවසේ සතියේ පලාපල කියන එක කරලියට එන්නේ ඉන්දියාවෙන්. එහේ දිනපතා පත්තර ටික විකුනගන්න එයාලා කරපු වැඩක් තමයි මේ. අපේ ටීවී චැනල් වලත්  විව්ස් හදාගන්න හැමදාම උදේ පාන්දර මේවා පෙන්නනවා. මේ දවස්වල අහවල් ලග්නෙට අසනීප වෙන්න අවධානමක් තියනවා කිව්වම ඉතින් ලක්ෂ ගානක් ඒ ලග්නේ තියන මිනිස්සුන්ගෙන් 10% හරි අසනිප වෙනවා. එයාලා මේක හරි කියලා හිතද්දී ඉතුරු හැමොම හිතනවා මේ විශය බොරුවක් කියලා. අන්න එකයි මෙතන ගැටලුව. අනික් ගැටලුව තමයි මේ විශය විශ්වාස කරන මිනිස්සු අර මනුස්සයා කියන දේ අහලා හිත කලබල කරගන්න එක. සමහරවිට තමන්ට ඒ සතිය නරක නැතත් අර මනුස්සයා කියපු නිසා සතිය පටන්ගන්නකොටම මේ සතිය තමන්ට හොඳ නෑ කියලා මානසික රාමුවක් හදාගන්න එක. ඉක්මනින්ම තවත් ලිපියකින් හමුවෙමු. 

සිද්ධි රස්තු

වෛදික ජ්‍යෝතිෂවේදී

ධනුෂ්ක අබේරත්න

ජ්‍යෝතිෂ් භාෂ්කර් (ඉන්දියා)

0755004166

ක්‍රියාකාරී අසුභයන්

යම් ග්‍රහයෙක්ගේ මුලත්‍රිකොන රාශිය යම් ජන්ම පත්‍රයක දුෂ්ට ස්ථානයක් (6, 8, 12) බවට පත් වේ නම්, එම ග්‍රහයා එම ලග්නයට ක්‍රියාකාරී අසුභයෙකි. 

ග්‍රහයන්ගේ මුලත්‍රිකොන රාශි පහත පරිදි වේ.

රවි -  සිංහ

චන්ද්‍ර - වෘෂභ

කුජ - මේෂ

බුධ - කන්‍යා

ගුරු - ධනු

ශුක්‍ර - තුලා

ශනි - කුම්භ

රාහු - කුම්භ

කේතු - සිංහ

රාහු හා කේතු සැම ලග්නයකටම ක්‍රියාකාරී අසුභයන් ලෙස සැලකේ.

ලග්නය	ක්‍රියාකාරී අසුභයන්
මේෂ	බුධ, රාහු, කේතු
වෘෂභ	කුජ, සිකුරු, ගුරු, රාහු, කේතු
මිථුන	රාහු, කේතු
කටක	ගුරු, සෙනසුරු, රාහු, කේතු
සිංහ	චන්ද්‍රයා, රාහු, කේතු
කන්‍යා	රවී සෙනසුරු, කුජ, රාහු, කේතු
තුලා	බුධ, රාහු, කේතු.
වෘශ්චික	සිකුරු, කුජ, රාහු, කේතු.
ධනු	චන්ද්‍ර, රාහු, කේතු
මකර	රවී, ගුරු, රාහු, කේතු.
කුම්භ	චන්ද්‍ර, බුධ, රාහු, කේතු
මිණ	රවී, සිකුරු, සෙනසුරු, රාහු කේතු.

කෘර සෞම්‍ය ගුණය කෙසේ වෙතත් මෙම ක්‍රියාකාරී අසුභයන් ඒ ඒ ලග්නයට අසුභ පල දීමට වැඩි සම්භාවිතාවක් ඇත. අනෙක් ග්‍රහයන් වෙතින් ලැබෙන දෘෂ්ටි සංයෝග අනුව හා ග්‍රහයා තැම්පත් වන ස්ථානය අනුව මේ තත්වය අඩුවැඩි වීමට හැකියාවක් ඇත.

මෙහිදී යම් ක්‍රියාකාරී අසුභයෙක් එම කේන්ද්‍රයේ ලග්නාධිපතියාද වේ නම් එම ග්‍රහයා ක්‍රියාකාරී අසුභයෙක් ලෙස කටයුතු නොකරයි. ඒ අනුව වෘෂභ හා වෘශ්චික යන රාශිදෙකේ පිළිවලින් සිකුරු හා කුජ යන ග්‍රහයන් දෙදෙනා ක්‍රියාකාරී අසුභයන් ලෙස ක්‍රියා නොකරයි.

වේදීය ජ්‍යෝතිශවේදී

ධනුෂ්ක අබේරත්න

ජ්‍යෝතිෂ් භාෂ්කර් (ඉන්දියා)

0755004166

නීච බංග රාජ යෝගය. (විස්තරාත්මක)

අද උදේ ඉඳලා වහින නිසා අද උදේ ජ්‍යෝතිෂ පන්තිය පවත්වන්න වුනෙත් නැ. ඒ නිසා අද ටිකක් වෙලාව ඉතුරු වුනා. ඉතින් මම හිතුවා නිකන් ඉන්න වෙලාවේ ටිකක් විස්තරාත්මකව වැදගත් දෙයක් ගැන ලියන්න ඕන කියලා.
අද ලියන්න යන්නේ නීච බංග රාජයෝගය ගැන. ඇත්තටම බංග කිව්වම අපි හිතන්නේ සම්පුර්ණයෙන්ම නැතිවෙලා යනවා කියන එක. වචනාර්තයත් එහෙම නිසා එහෙම හිතීමේ වරදක් නැ. නමුත් ඇත්තටම නීච බංග කියන්නේ එකමද?
මේක ගැන කතාකරන්න නම් අපි ඉස්සෙල්ලම නීච ග්‍රහයෙක් කියන්නේ කවුද කියලා තේරුම් ගන්න ඕනා. ග්‍රහයෙක් නිචවෙන්නේ තමන් ඉන්න රාශියේ ස්වාභාවය හා ලක්ෂණ නිසා තමන්ගේ ස්වාභාවයෙන් තමන්ට අයිති ගතිලක්ෂණ ප්‍රකාශ කරගන්න බැරි වුනාම. මේ නිසා ඒ ග්‍රහයා පිඩාවට පත්වෙනවා.  රවි, චන්ද්‍ර, කුජ, බුධ, ගුරු, සිකුරු, ශනි, රාහු, කේතු යන ග්‍රහයින් පිලිවෙලින් තුලා, වෘශ්චික, කටක, මිණ, මකර, කන්‍යා, මේෂ, වෘශ්චික හා වෘෂභ යන රාශි වල නිචත්වයට පත්වෙනවා. (රාහු හා කේතුගේ නිචත්වය සම්භන්ධව ගැටළු සහගත තත්වයක් තියනවා. ඉදිරියේදී මේ ගැන වෙනම ලිපියක් දාන්නම්)

මෙතැනදී බංග වීම කියන්නේ තවත් ග්‍රහයෙක්ගේ උපකාරයෙන් තමන් සිටින අපහසු තත්වයෙන් අස්වැසිල්ලක් ලැබීම කිව්වොත් වඩා නිවැරදියි. ඒ කියන්නේ තත්වයෙන් සම්පුර්ණවම මිදෙන්නේ නැති වෙන්න වුනත් ඉඩ තියනවා. සමහරවිට පිහිටීම අනුව මේ අස්වැසිල්ල ඉතා බලවත් එකක් වෙන්නත් පුළුවන්.

ඊළඟ වචනය තමයි රාජ යෝගය කියන එක. හැම නීච බන්ගයක්ම රාජ යෝගයක්ද? (අපි අහලා තියන්නේ නීච බංග රාජයෝග කියලමනේ) නීච බංග වීම නීච බංග රාජයෝගයක් වෙන්නේ එය කෙක්න්ද්‍රස්තානයක (කේන්ද්‍රයේ 1,4,7,10 ස්ථාන) සිදුවෙනවානම්.

මම හිතන්නේ දැන් මාතෘකාව ගැන අවභෝධයක් ඇති. දැන් අපි කතාකරමු නීච බංග වෙන විදි ගැන.


01. නීච ග්‍රහයා සිටින රාශි අධිපතියා කේන්ද්‍ර ස්ථානයක (ලග්නය ,4, 7, 10) තැම්පත්ව සිටීම.

උදාහරණයක් ලෙස සුප්‍රසිද්ධ දීපක් චොප්රා ගේ ජන්මපත්‍රය දෙස අවධානය යොමු කරමු
22 October 1946 at 15:45 (= 3:45 PM ) New Delhi, India, 28n36, 77e12

මේ හඳහනේ රවි ඉන්නේ තුලා රාශියේ නීච වෙලා. නමුත් මේකේ තුලාව අයිති සිකුරු තම්පත්වෙලා ඉන්නේ කේන්ද්‍රස්ථානයක් වෙන 10 වැන්නේ. මේ නිසා මේකේ රවිගේ නිචත්වය බංගවෙලා තියනවා. අපි කවුරුත් දන්නවා දීපක් චොප්රා අධ්‍යාත්මික දියුණුව පැත්තට බර ඒ වගේම ඉතාම ධනවත් කෙනෙක් බව.


02. නීච ග්‍රහයා සිටින රාශියේ උච්ච වන ග්‍රහයා කේන්ද්‍රස්ථානයක තැම්පත් වීම.

ඒ කියන්නේ උදාහරණයකට ගුරු ග්‍රහයා ගත්තොත් ගුරු නීච වෙන්නේ මකර රාශියේ එතකොට මකර රාශියේ උච්ච වෙන කුජ ග්‍රහයා කේන්ද්‍රස්ථානයක තප්මත් වුනොත් ගුරුගේ මේ කියන නිචත්වය භංග වෙනවා.

උදාහරණයකට අපි ගමු ලෝකප්‍රසිද්ධ ගායිකාවක් වන සුසන් බොයිල් ගේ හඳහන
1 April 1961 at 09:50 (= 09:50 AM ) Bangour Village Hospital, Scotland, 55n5525, 3w33

මේ හඳහනේ ගුරු ග්‍රහයා අටවැන්න වන මකරයේ නීච වුනත් මකරයේ උච්ච වෙන කුජ ඉන්නේ ලග්නයේ. මේ නිසා නිචත්වය බංග වෙන පිහිටීම යෙදෙනවා. සුසන් බොයිල් කවුද කියලා දන්නේ නැත්තන් පල්ලෙහා වීඩියෝ එක බලන්නකෝ.

හරි දැන් මහන්සි නිවෙන්න ඇතිනේ. එහෙනම් යමු ඊළඟ කොටසට

03. නීච ග්‍රහයා යම් රාශියක උච්ච වෙනවද අන්න ඒ රාශිය අධිපතියා කේන්ද්‍රස්ථානයක සිටීම

මෙහෙම කිව්වම ටිකක් පැහැදිලි මදි වගේ නේද? හිතන්න හඳහනේ සිකුරු නිචයි කියලා. සිකුරු නීච වෙන්නේ කන්‍යා රාශියේ. මේ නීච සිකුරු උච්ච වෙන්නේ මිණ රාශියේ. නීච සිකුරු උච්ච වෙන මිණ රාශියේ අධිපතියා (වන ගුරු) කේන්ද්‍ර ස්ථානයක හිටියොත් මි සිකුරුගේ නිචත්වය බංග වෙනවා.

උදාහරණයකට ලෝක පුජිත පාපන්දු ක්‍රීඩක පෙලේ ගේ හඳහන බලමු.
 21 October 1940 at 03:00 (= 03:00 AM ) Três Corações (Minas Gerais), Brazil, 21s4149, 45w1512
BZT h3w (is standard time)

මේ හඳහනේ සෙනසුරු නිචයි. නමුත් සෙනසුරු උච්ච වෙන තුලා රාශිය අධිපති සිකුරු කේන්ද්‍රස්ථානයක තැම්පත් වෙලා ඉන්නේ. මේ නිසා නීච බන්ගයක් මේ හඳහනේ යෙදීලා තියනවා.


04. හඳහනේ නීච ග්‍රහයා නවාම්සයේ උච්ච වීම.
මෙයින් නිවේදනය වෙන්නේ ග්‍රහයා නීච වුනත් එයට ප්‍රතිවිරුද්ධව නැගී ඉන්න පුර්ව කර්ම මත ශක්තිය ඇති බවයි.
උදාහරණයකට අපි හැමෝම වගේ කැමති රංගන ශිල්පිනියක් හා නිරුපන ශිප්ලිනියෙක් වෙන නයෝමි කැම්බල් ගේ හඳහන දිහාවට අවධානය යොමු කරමු.

22 May 1970 at 00:52:32 (= 12:52 AM ) Westminster, England, 51n30, 0w09
MET h1e (is standard time)

  

මේ හඳහනේ හතර වැන්නේ එහෙමත් නැතනම් මව ක්‍රමවත් අධ්‍යාපනය ගෙවල් දොරවල් හා උපන් බිම ගැන කියවෙන ස්ථානයේ සෙනසුරු නීච වුනත් නවාම්සයේ සෙනසුරු උච්චයි. ඇය උපදිනවිට අයගේ මව අවුරුදු 19 අඩු (teenage Mom) කෙනෙක් වූ අතර පියා ගැන සඳහනක් නැත. මවට ඇගේ අධ්‍යාපන වියහියදම් පවා දැරීමට නොහැකි වූ අතර ඇය අයගේ දියුණුව තනිවම සලසාගත් කෙනෙකි.

05. නීච ග්‍රහයෙක් තවත් නීච ග්‍රහයෙක් විසින් දැකීම.

ඔබව පාසල් කාලයේ පන්තියෙන් පිටත දණගස්වා තිබේද? එවිට අල්ලපු පන්තියෙත් කෙනෙක්ව දැනගස්සලා තියනවා දැක්කම අර මුලින් තිබ්බ තත්වයට වඩා පොඩි මානසික සහනයක් දැනුනා නේද? මේකත් අන්න ඒ වගේ දෙයක්.

උදාහරණයක් බලමු.
සුප්‍රසිද්ධ ගත්කතුවරයෙක් වූ ඔට්ටෝ ෆ්ලෙක්
29 October 1880 at 04:00 (= 04:00 AM ) Metz, France, 49n08, 6e10

මෙහි සෙනසුරු මේෂ රාශියේ නිචව ඇති අතර රවි ග්‍රහයා තුලාවේ නීචය මෙහිදී දෙදෙනා එකිනෙකා වෙත දෘෂ්ටි හෙලන අතර එකිනෙකා අනෙකාගේ නිචත්වය භංග කරයි. මෙලෙස අන්යෝන්ය වශයෙන් දෘෂ්ටි නොවටුනත්. නීච ග්‍රහයෙක් වෙත තව නීච ග්‍රහයෙක්විසින් දෘෂ්ටි දීම නිසා එම දෘෂ්ටි ලබන ග්‍රහයාගේ නිචත්වය භංග වේ.

06. නීච ග්‍රහයා තමා සිටින රාශි අධිපතියා විසින් දැකීම.
උදාහරණයකට ගුරු හඳහනේ නිචයි කියා හිතමු. ගුරු නීච වෙන්නේ මකර රාශියේ. මෙහෙම වෙලාවට මකර රාශිය අධිපති සෙනසුරු විසින් ගුරුට ග්‍රහ දෘෂ්ටියක් ලබා දෙනවා නම්. ගුරුගේ නිචත්වය භංග වෙනවා.

උදාහරණයකට ජනප්‍රිය නළුවෙක් වෙච්ච රිචර්ඩ් ක්‍රෙන්නා ගේ හඳහන බලමු (රම්බෝ ෆිල්ම් ටික බැලුවනම් මෙයා තමයි රම්බෝගේ උසස් නිලධාරියා විදිහට ඉන්නේ)
30 November 1926 at 16:14 (= 4:14 PM ) Los Angeles, California, 34n03, 118w15
Timezone PST h8w (is standard time)

මේ හඳහනේ ගුරු ග්‍රහයා නමවැන්නේ නිචව ඉන්නේ නමුත් ගුරුග්‍රහයා නීච වෙලා ඉන්න මකර රාශියේ අධිපතියා ගුරු ග්‍රහයාට දෘෂ්ටියක් ලබා දෙනවා.මේ නිසා ගුරු ග්‍රහයාගේ නිචත්වය භංග වෙනවා.

මෙතැනදී විශේෂයෙන් මතක් කරන්න ඕන මේ නිචත්වය බංග වෙන්න පාදක වෙන ග්‍රහයන් හා ඒ බංග වෙන ක්‍රම අනුව ප්‍රතිපල වෙනස් වෙනවා. අපි පස්වෙනි උදාහරණයට ගත්ත ඔට්ටෝ ෆ්ලෙක් ගේ හඳහනේ නීච භංග වීම වෘතියට ඉතා යහපත් ලෙස බලපාන අතර පෞද්ගලික ජිවිතයට ලොකු උදව්වක් වෙන එකක් නෙමෙයි.


07. නීච ග්‍රහයා රාශිය අධිපතියා එක්ක සංයෝග වීම

උදාහරණයකට අපි ලෝකයේ තුන්වන ධනවතා වන warren buffet ගේ හඳහන පරික්ෂා කරමු
30 August 1930 at 15:00 (= 3:00 PM ) Omaha, Nebraska, 41n16, 95w56

මේ හඳහනේ සිකුරු කන්‍යා රාශියේ නීච වුනත් කන්‍යා රාශිය අයිති බුධ සමග සංයෝග වෙලා ඉන්නේ. රාශිය අධිපතියා නිසා බුධ රාශියේ වැඩි බලයක් ඇතුව ඉන්න නිසා සිකුරුගේ දුර්වල කමත් මැකෙනවා. හරියට කිව්වොත් ඔය දේශපාලකයෝ ගාව ඉන්න හෙන්චයියෝ වගේ. දේශපාලකයාගේ බලය නිසා හෙන්චයියගේ දුර්වලකම් යටපත් වෙනවා.

08. නීච ග්‍රහයෙක් එක්ක උච්ච ග්‍රහයෙක් සංයෝග වුනොත්

මේකත් කලින් වගේම බලවතාගේ බලය නිසා දුර්වලයා තමන්ගේ දුර්වලකම යටපත් කරගන්න අවස්තාවක්.
උදාහරණයකට ලෝකේ ධනවතා ලෙස සලකන බිල්ගේට්ස් ගේ හඳහනම බලමු
28 October 1955 at 22:00 (= 10:00 PM ) Seattle, Washington, 47n36, 122w20
Timezone PST h8w (is standard time)

මේ හඳහනේ රවි නීච වුනත් උච්ච සෙනසුරු සමගයි ඉන්නේ ඒ විතරක් නෙමෙයි 07 වෙනි නිතිය යටතේ කතා කළා වගේ නීච රවි රාශිය අධිපති සිකුරුත් එක්කත් සංයෝගයි. මේ දෙආකාරයෙන්ම රවිව බලවත් ජිරිම නිසා රවි මේ හඳහනේ සෑහෙන්න බලවත් කොච්චර බලවත්ද කියලා ආයේ අමුතුවෙන් කියන්න දෙයක්  නැනේ.

09. නීච ග්‍රහයා පරිවර්ථන යෝගයකට  සම්භන්ධ වීම
පරිවර්ථන යෝගය ගැන දන්නේ නැතිනම් මෙතනින්  ගිහින් බලන්න
මෙතැනදී වෙන්නේ පරිවර්තනය වුන ග්‍රහයා නිච ග්‍රහයගේ නිවෙදකත්වයන් ආරක්ෂා කරන්න උදව් කිරීම නිසා නිචත්වය බංග වීම. හැබැයි හොඳට මතක තියාගන්න මේ පරිවර්තනය මහාපරිවර්තනයක්ද නැද්ද එහෙම නැත්තන් දෛන්ය පරිවර්තනයක්ද කියන එක ගැනත් අවධානය යොමු කරන්න ඕන.

අපි උදාහරණයක් විදිහට නොබෙල් සම්මාන ලාභී ඩේවිඩ් බැල්ටිමෝර්ගේ හඳහන බලමු
7 March 1938 at 14:18 (= 2:18 PM ) Manhattan NY, USA, 40n46, 73w59
Timezone EST h5w (is standard time)

මේ හඳහනේ හත්වැන්න හා නමවැන්න අතර මකා පරිවර්තනයක් සිදුවෙලා තියනවා වගේම ගුරු ගේ නිචත්වය බංගවෙලා නීච බංග රාජයෝගයක් යෙදීලා තියනවා. 

ග්‍රහයෙක් නීච වෙලා ඉන්නවා දැක්කගමන් ගොඩක් දෙනා වැරදි  නිගමන වලට එනවා. නමුත් එහෙම තීරණය කරන්න කලින් සැහෙන්න පරික්ෂාවට ලක්වෙන්න ඕන කියලා දැන් තේරෙනවා නේද? අර ටි.වී පෙට්ටියේ ග්‍රහයෝ ටික අහලා නවාම්සය නැතුව පලාපල කියන අයගෙන් හඳහන් බලන අයට ඉතින් අබ සරණයි කියලා ඔයාලට හිතෙනවනම් මම පුදුම වෙන්නේ නැ.

වෛදික ජ්යෝතිෂවේදී 

ධනුෂ්ක අබේරත්න

ජ්‍යෝතිෂ් භාෂ්කර් (ඉන්දියා)

0755-004166