෴නීච වෘත්තී යෝග හෙවත් පහත් රැකියාවක් කිරීමට පොළඹවන යෝග෴

කොච්චර මහන්සි වුනත් සමාජයේ පහත් යැයිසැලකෙන රැකියාවක් මිසක් එතනින් ඉහලට ඒමක් නැති අය අපි සමාජයේ දැක ඇත්තෙමු. එමෙන්ම කොතරම් හොඳ රැකියාවක් ලැබුනත් සමාජයේ පහත් යැයි සම්මත රැකියාවක්ම කිරීමට කැමති මිනිසුන්ද අපි දැක ඇත්තෙමු. මෙසේ වීම ජ්‍යෝතිෂමය වශයෙන්ද පැහැදිලි කර ඇති පැරැනි පුස්කොලයක් දින කීපයකට උඩදී මට මුනගැසිනි. එහි මෙසේ සඳහන් වේ

භග්‍යාධිපෙ සූර්ය සුතෙ ධනස්ථේ
සුථස්ථි වා භ්‍යශුභප්‍රදෘෂ්ටෙ
යදා සපාපෙ රිපුභාව සංසේථ
ස්‍යාජ්ජීවනං තස්‍ය ච නීචවෘත්‍යා

9වන භාවය අධිපති ශනි (ශනි හට 9වන භාවය අයත් වන්නේ ලග්නය වෘෂභ හෝ නිථුන වූ විටය ) ධනස්ථානයේ (2 වැන්නේ) හෝ 5වන භාවස්ථානයේ සිටීද පාප ග්‍රහයන්ට පෙනේද එසේත් නැතිනම් පාපග්‍රහයන්ට සංයෝගව 6වැන්නේ සිටීද එකල උපන් මිනිසා නීච වෘතියකින් ජීවිකාව ගෙන යයි.

කාලානිධෙඃ කර්ම ගතෙ'ක්‍රි පුත්‍රෙ
ලග්නාත් සුතෙ ධර්මගතේ ධනේ වා
මෘත්‍යුස්ථිතෛඃ පාප නහශ්ව රෙනෛද්‍රඃ
ස්‍යාජ්ජීවනං තස්‍ය ච නීචවෘත්‍යා

ශනි සඳුගෙන් දසවැන්නේ හෝ ලග්නයෙන්  දෙවන පස්වන හෝ නවවන භවයක සිටීද එම අවස්ථාවේ අටවන භාවයේ පාපයනුත් සිටීද එසේ කල උපන් මිනිසා අධම වෘතියකින් සිය ජීවිකාව කරයි 

ජෝතිශ දැනුම ඇති අයගේ  දැනුමට වැඩි යමක්

චෙත් ප්‍රාග් විලග්නේ'ක්‍රී සුතස්‍ය දෘකේක
කේන්ද්‍රස්ථ චන්ද්‍රේණ නිරික්ෂිතෙ ච
භූපාන්වයෙ යද්‍යාපි ජාතජන්මා
ස්‍යාන්නීචකර්මා පුරුෂො භවෙත් සඃ

ලග්නයෙහි ශනිට අයත් ද්‍රේශ්කානයක් වේද කෙන්ද්‍රස්ථානයක සිටින චන්ද්‍රයා එය දකීද එකල රජ පවුලක වුව උපත ලැබූ පුරුෂයා නීච ක්‍රියාවන්ගෙන් ජීවිකාව කරයි.

ඔබට මේ සම්බන්දව ඇති ඔනැම ගැටලුවකට මට හැකි පමනින් පිලිතුරු දීමට මා සූදානම් බව පැවසීමට කැමැත්තෙමි.

වෛදික ජ්‍යොතිෂවේදී

෴ධනුෂ්ක අබේරත්න෴

ශක්‍ර දෙවියන්ට නෙත් දහසක් ලැබුන හැටි

මෙය ජනප්‍රවාදයකි. මෙයින් ශක්‍ර දේවේන්ද්‍රයන්ට අපහාසයක් කිරීමට කිසිම බලාපොරොත්තුවක් නැත.

පුරාන කාලයේ හිමාලය ආශ්‍රිතව යෝගී වරුන් සෘෂිවරුන් වාසය කලා. මොවුන් බොහොදෙනෙක් විවිධ ලෞකික ධ්‍යාන ලබා ගත් අය.. සමහරු විවාහ නොවී හිටිය සමහරු විවාහ වෙලා හිටියා. මේ කාලයේ ගෞතම කියලා මුනිවරයෙක් හිටියලු තමන්ගේ බිරිඳ සමග හිමාල වනයේ. මේ මුනිවරයා ඉතා බලගතු ධ්‍යාන ලැබු මුනිවරයෙක්ලු. මේ මුනිවරයට මහත් වූ සෘද්ධි බලයක් තිබුනලු. ඉතින් මේ සෘද්ධි බලයෙන් ඔහු විව්ධ දිව්‍ය ලෝක බ්‍රහ්ම ලෝක වලට යැමේ හැකියාවත් තිබුනලු.
මේ ගෞතම මුනිවරයගෙ බිරිඳ ඉතාමත් ලස්සන කාන්තාවක්ලු. දිනක් ඇය තමන්ටත් දිව්‍ය ලෝක බලන්න යන්න කැමත්තක් ඇති බව ගෞතම මුනිවරයට කිව්වහම ඔහු ඇයව තව්තිසාවට එක්කන් ගියලු. තව්තිසාවේ දෙවියන්ටත් හරි පුදුමලු ගෞතම මුනිවරයගේ බිරිඳව දැකලා. කොහොමින් කොහොම හරි ගෞතම මුනිවරයා තමන්ගේ සුරූපී බිරිඳ එක්ක තව්තිසාවට ඇවිත් ඉන්න බවත් ඔහුගේ බිරිඳගේ රූප ශෝභාව ගැනත් ශක්‍ර දෙවියන්ට ආරන්චි වුනලු. ශක්‍ර දෙවියනුත් ඇවිත් බලුවලු මේ කතාව අත්තද කියලා. ඇස් අදහා ගන්න බැරි තරම්  ලස්සන මේ කාන්තාව දැක්කම ශක්‍ර දෙවියන්ට පහත් ආශාවක් හට ගත්තලු. නමුත් තමන් ශක්‍ර දෙවියන් නිසාත් ශක්‍රයා තබා සමන්‍ය දෙවි කෙනෙක්ටවත් මේ වගේ වැඩක් නුසුදුසු නිසාත්  අමාරුවෙන් හිත හදාගෙන හිටියලු. ඉතින් ගෞතම මුනිවරයා නැවත හිමාල අඩවියටම ගියාලු.
ශක්‍ර දෙවියන් කොච්චර උත්සහ කලත් ගෞතම මුනිවරයගේ බිරිඳ ගැන ඇති වුන ආශාව හිතෙන් අයින් කරන්න බැරි වුනාලු. අවසානයෙ තවත් මෙය දරාගෙන ඉන්නට  නොහැකි වුන ශක්‍ර දෙවියන් චන්ද්‍ර දෙවියන් කැඳවා මේ විස්තරය කිව්වලු. චන්ද්‍ර දෙවියන් අකමැත්තෙන් වුනත් ශක්‍ර දෙවියන්ට ඇති හිතවත් කම නිසා මෙයට සහය දීමත් මේ රහස රැකීමටත් කැමැත්ත දුන්නලු. ඉතින් ශක්‍ර හා චන්ද්‍ර දෙවිවරුන් සැලැස්මක් හැදුවලු. ගෞතම මුනිවරයා සෑමදාම කුකුලා හඬලන විට ගඟට ගොස් නා පිරිසිඳුවී ඉර නැගෙනතුරු භාවනා කරන නිසා චන්ද්‍ර දෙවියන් කුකුලෙකුගේ වෙස් ගෙන මද්‍යම රාත්‍රියේදි හඬලා ගෞතම මුනිවරයා ඇහැරවීමටත් එවිට නා පිරිසිඳුවී භාවනාකරන මුනිවරයා ඉර නැගෙන තුරු භාවනා කරන නිසා ඒ කාලයේදි ශක්‍ර දෙවියන් මුනිවරයාගේ වෙස් ගෙන මුනිවරයාගේ නිවසට ගිහින්  තම මනදොල සපුර ගන්න තීරනය කලාලු.
ඉතින් සැලැසුමේ විදිහට මධ්‍යම රාත්‍රියේ චන්ද්‍ර දෙවියන් කුක්කූට වෙස් ගෙන හඬලලා මුනිවරයව ඇහැරෙව්වලු.. ඇහැරුන මුනිවරයා ටිකක් දුර ගිහින් අහස දිහා බලපුවම තාරකාවල පිහිටීම අනුව තමන්ට වේලාව වැරදී ඇති බව දැනගෙන නැවතත් නිවසට ආවලු,
මේ අතරේ ශක්‍ර දෙවියන් ගෞතම මුනිවරයගෙ වෙස් ගෙන නිවසට පැමින මුනිවරයාගේ බිරිඳට ලන්වෙන්න උත්සහ කරන විටම මුනිවරයා නිවසට ඇතුල්වුනාලු. තමන්ට වැඩේ වැරදුන බව දැනගත් ශක්‍ර දෙවියන් බලල් වෙසක් මවාගෙන එතනින් පැනගියාලු. කාරනය එක වරම තේරුම් ගත් මුනිවරයා අනුන්ගෙ කම් සැපතට ලොල්වූ ශක්‍ර දෙවියන්ගේ ශරීරයේ ස්ත්‍රී යෝනි 1000ක් මැවෙන්නට බලවත් ශාපයක් කලාලු. මේ ශාපයෙන් ශරීරය පුරා ස්ත්‍රී යෝනි ඇති වුන ශක්‍ර දෙවියන් ලැජ්ජාව නිසා සඟවී සිටියාලු. 
දේව සභාව රැස්වන දිනයේ සක්දෙවියන් නැතිව දේව සභාවේ වැඩ ආරම්භ කල නොහැකි නිසා ඊශ්වර දෙවියන් සක් දෙවිඳු සොයාගෙන ගියාලු. ශක්‍ර දෙවියන්ගෙන් හා චන්ද්‍ර ද්වියන්ගෙන් විස්තර අසා දැනගත් ඊශ්වර දෙවියන් ගෞතම මුනිවරයා හමුවී ශක්‍ර දෙවියන්ට සමාව දෙන ලෙස ඉල්ල සිටියලු. ශක්‍ර දෙවියන් නොමැතිව දේව සභාවේ වැඩ කරගත නොහැකි නිසාත් ශක්‍ර දෙවියන් පත්ව ඇති අපහසු තත්වය නිසාත් යෝනි දහස ඇස් දහසකට පරිවර්තනය වන ලෙස ශාපය ලිහිල් කලාලු. 

වෛදික ජ්‍යොතිෂවේදී

෴ධනුෂ්ක අබේරත්න෴

දෙයියන්ගේ ලෙඩ

වරක් දේව සභාව රැස්වන දිනයට අදාල සැරසිලි ආදිය කිරීම කතරගම දෙවියන්ට බාරවුනාලු. නමුත් කොහොමින් කොහොම හරි මේ වැඩය කතරගම දෙවියන්ට අමතක වුනාලු. මේ මහා දේව සමුලුවට කලින් දවසේදී තමයි හදීසියේම මේක මතක් වෙන්නේ. අන්තිම මොහොතේ මේක කරන්නේ කොහොමද කියල කල්පනා කරනකොට මතක් වුනාලු මීට කලින් වතාවක පවත්වපු  යක්ෂ සමුලුවේ ඉතාම හොඳ සැරසිලි කරලා තිබ්බ කියලා අනෙක් යක්ෂයන් ගරා යකාගේ හොඳ කිව්ව එක.. කතරගම දෙවියොත් ගරායකාව කැඳවලා වැඩේ බාරදුන්නලු හොඳින් කරන්න කියලා.
                              දැන් ගරා යකා කල්පනා කරනවලු එයා යක්ෂ සමුලුවේ කරපු විදිහටම ලස්සනට සරසන්න ඔනේ කියලා.. එහෙම හිතලා යක්ෂ සමුලුව සරසපු විදිහටම ඇටකටු, මස් කෑලි, බොකු බඩවැල් ගෙනල්ලා මුලු දේව සභාවම සැරසුවලු.
                              පහුවෙනිදා රැස්වීමට දෙවියන් ආවම මුලු ශාලාවම ඇටකටු, මස් හා බඩවැල් වලින් සරසලා තියනවා දැක්කලු. මේක දැකපු දෙවියන් කතරගම දෙවියන්ට හොඳටම දොස් කිව්වලු. කෝපයට පත් කතරගම දෙවියනුත් ගරා යකාට බැනවැදිලා කිව්වලු වහාම ශාලාව අස් කරන්න කියලා. මස් විසිකරන්න ලෝබ වුන ගරා යකා කටු සූප්පු කරමින් මස් කන්න ගත්තලු.. 
                              මස් කනවා දැකලා ඇතිවුන අපුලත් මස් වල සුවඳ අග්‍රහනය වීමත් මාංශ හා ලේ ඇඟේ ගෑවීමත් නිසා දෙවියන් අසනීපවෙන්න ගත්තලු. ඇඟ කහ ගැහිලා උන හැදුනලු සමහරුන්ගේ ඇඟේ කුඩා බිබිලි එන්න ගත්තලු. දෙවියන්ගේ ලෙඩ වල ආරම්භය ගැන ජනප්‍රවාදයේ එන්නේ එහෙමයි
                              කොහොම හරි මේ අයව බේරගන්න පුලුවන් වුනේ පත්තිනි මැනියන්ටලු. ඇගේ සලුවෙන් හත් වරක් පවන් සැලුවම දෙවියන් සුව වුනාලු. අන්න ඒ නිසාලු සරම්ප පැපොල වගෙ දෙවියන්ගේ ලෙඩ හැදුනම මිනිස්සු පත්තිනි මෑනියන්ට බාර වෙලා පිහිට පතන්න පුරුදු වුනේ.

෴ මූසල යෝගය හා රජ්ජු යෝගය ෴

මේ යෝග ගැන අදහසක් ගැනීමට ප්‍රථම චර හෙවත් වෙනස්වන රාශි, තිර හෙවත් ස්ථීර රාශි හා ස්වාභාව දෙකම ඇති උභය රාශි ගැන අවබෝධයක් ඔබට තිබීම වඩා සුදුසු යැයි සිතමි.
චර, තිර හා උභය රාශි පහත ලෙස දැක්විය හැකිය.

• මේෂ   - චර
• වෘෂභ  - තිර
• මිථුන  - උභය
• කටක  - චර
• සිංහ    - තිර
• කන්‍යා - උභය
• තුලා    - චර
• වෘශ්චික - තිර
• ධනු     - උභය
• මකර   - චර
• කුම්භ  - තිර
• මීන     - උභය

මූසල යෝගය

මුසල යෝගය යන නම ලැබුනාට සත්‍ය වශයෙන්ම මෙම යෝගය යහපත් එකකි. මෙම යෝගය යෙදෙන්නේ යම් හඳහනක තිර රාශි වල පමනක් සියලූම ග්‍රහයන් තැම්පත් වීමෙනි.. 

මෙම යෝගයෙන් උපන් තැනැත්තා වෙළහෙළඳාමෙන් ජය ලබන අය වෙති. දක්ශ ව්‍යාපාරිකයෝය..

රජ්ජු යෝගය

හඳහනක සියලූම ග්‍රහයන් චර රාශි වල පමනක් පිහිටා තිබීමෙන් රජ්ජු යෝගය යෙදේ. 

මෙම යෝගයෙන් උපන්නෝ වැදගත්ය.. ඔවුන්ගේ දරුවෝ ප්‍රසිද්ධියට පත්වෙති. නමුත් මොවුන් මධ්‍ය ආයුශ ඇත්තන්ය..

වෛදික ජ්‍යොතිෂවේදී

෴ධනුෂ්ක අබේරත්න෴

෴සිංහාසන යෝගය෴

මෙයද තරමක් දුර්ලභ යෝගයකි... නමේ හැටියටම රාජ යෝගයකි... මේ යෝගය ඇති අය ඉතා උසස් තත්වයට පත්වේ.. 
සිංහාසන යෝගය යෙදන ආකාරය
සියළුම ග්‍රහයන්(යුරේනස්,නැප්චූන්,ප්ලූටෝ හැර) 2,6,8,12 ස්ථානවල තැන්පත් වමයි.
සිංහාසන යෝගය ඉතා බලවත්ව යෙදීමට නම් චර රාශි (මේෂ,කටක,තුලා.මකර) ලග්නයකින් ඉපදී ඉහත පරිදි ග්‍රහයන් පිහිටිය යුතුය.


පල විපාක
ප්‍රධානියන් අතරද ප්‍රධාන තැන ලබයි.බලවතුන්ගෙන් ගරු බුහුමන් නම්බු ලබයි.සැප සම්පත් ලැබේ.කීර්තිය දසත පැතිරේ,ප්‍රසිද්ධවේ.රජෙකු හා සමාන තත්ත්ව ලබා ගනී. ඉතාම බලවත් පුද්ගලයෙක් වේ.

විශේෂ කරුණු
සිංහාසන යෝගය දැලි පිහියෙන් කිරි කනවා වැනි යෝගයකි... දෙක,හය,අට දොළහ කේන්ද්‍රයක අසුභ ස්ථානයන් ලෙස සැලකේ. රෝග,මාරක හා වැය වලට සම්බන්ධවේ… මෙම ස්ථාන හතරේ සියළු ග්‍රහයන් පිහිටීම සුභ යෝගයක් වන්නේ කෙසේදැයි කෙනෙකුට විටකදී සැක පහළ විය හැකිය.
සත්‍ය වශයෙන්ම මෙම යෝගය ඇති අයට කුඩා කල සිටම කරදර බාධක වැඩිය.සිංහාසන යෝගය ගැන සදහන් වන පැරණි පොත් වල "සිංහාසන යෝගයෙන් උපන් තැනැත්තා කුඩා කාලයේදී නොමලොත් සිංහාසනයේ වාඩිවෙයි" යනුවෙන් සඳහන් වන්නේ මේ නිසාය

වෛදික ජ්‍යොතිෂවේදී

෴ධනුෂ්ක අබේරත්න෴

෴ස්ත්‍රී පුර්ෂ වශී යන්ත්‍රයක්෴

අනෙකුත් යන්ත්‍ර වලදී කරන ආකාරයට පුද පූජා පවත්වා දිෂ්ඨි කල පසු 1000 වරක් ජප කර. ප්‍රාන පුඨ පලිප්පු සිද්ධි කර. උවමනා අයට පන්නවා, නැවතද ජප කර ගෙල බැඳ පෙනෙන්නට යනු.

මෙය හුදෙක් පාඨකයාගේ දැනගැනීම හා විනෝදස්වාදය පිනිස පල කල අතර, සූනියම් හා වශී ගුරුකම් යන දෙකම මා අනුමත නොකරන නමුත් සෙතක් ශාන්තියක් ලබාගැනීම පිනිස පමනක් මෙම ශාස්ත්‍රය භාවිතා කිරීම සුදුසු බව මාගේ මතයයි. මෙහිදි පුඨ,පලිප්පු,සිද්දි යන මන්ත්‍ර පල නොකලේද ඒ නිසාමය

වෛදික ජ්‍යොතිෂවේදී

෴ධනුෂ්ක අබේරත්න෴

෴සෙනසුරු ඒරාශ්ඨකයට පිලියම්෴

සෙනසුරු ඒරාශ්ඨකය කියු වහාම බොහෝ දෙනාගෙ හිතට අමුතු බයක් දැනෙන එක සාමන්‍යය දෙයකි.. එයට සාධාරන හේතුවකුත් තියන බවද පෙනෙන්නට ඇත.. සෙනසුරු සාමන්‍යයෙන් ප්‍රසිද්ධවී ඇත්තේ අසුභ පල දෙන ග්‍රහයෙක් හැටියටය .. නමුත් සෙනසුරු ඒරාශ්ඨක කාලෙදි සමහරුන්ට මාරක අපල දුන්නත් තවත් සමහරුන්ව ගොඩක් ඉහල තැන් වලට පත්කරන බව පෙනෙන්න තිබේ.. කොයි තරම් හොඳ කලත් ඒරාශ්ඨකය අවසන් වෙනකොට කුමක් හෝ කරදරයක් කරන බව කතෘගේ අත්දැකීමයි..
සෙනසුරු ඒරාශ්ඨක අපලයට කරන ප්‍රථිකර්ම පහත පරිදි දැක්විය හැක

01. කාක නිල මැනිකක් සහිත මුදුවක් පැලඳීම
මෙහිදී ඔබ කොතරම් ධනවතෙක් වුවද මුදුව රත්‍රනින් නොකල යුතුය.. යකඩයෙන් දැමීම වඩා සුදුසු වන අතර එසේ සකස් කරගත නොහැකිනම් රිදියෙන් සකස් කරගත යුතුය.

02. කපුටුදානය දීම
සෙනසුරාදා දිනවල පාන්දරින් නැගිට කථා නොකර හිස්බඩම හොඳින් පිරිසිඳු වී මෙය ආරම්භ කල යුතුය. කිරිබත සෑදීමට ගතයුත්තේ කැකුලු සහල්ය.. කිරිබත සදා අවසන් වන තුරු පොල්කුඩු ටිකවත් සතුන්ට ඉඳුල් කරන්නට ඉඩ නොතැබිය යුතුය.. එමෙන්ම කිරිබත සාදන විට දිව ගා රස බැලීම නොකල යුතුය... කිරිබත සකසි කල පසු එලඟිතෙල් මිශ්‍ර කර ගුලි 9ක් සාදාගන්න.. නුගපත් 9ක් ගෙන ඒ මත එම ගුලි තබන්න..
තමා පදිංචි භූමියේ අඩි 5ක් පමන උසට මැස්සක් සකස් කරගන්න (ඒ ස්ථානය ඉතා පිරිසිඳු විය යුතුය ) නෙලුම් මලක ආකරයට කිරිබත් සහිත නුගපත් තබා ගිතෙල් පහනක්ද ඒ අසලම දල්වන්න.. තමන්ට ඇති සෙනසුරු අපල මේ දානයේ ආනිශන්සයෙන් දුරුවෙවායි ප්‍රාර්ථනා කරන්න..
සෙනසුරාදා දිනවල ශනි හෝරාවේදි මෙම දානය දිය යුතුය ( සෙනසුරාදා ඉර උදාවේ සිට පැයක කාලය මෙය සාමන්යෙන් උදේ 6-7 දක්වාය )

03. බෝධිපූජා පැවැත්වීම
මෙහිදි බෝධි පූජාව පවත්වන පිලිවෙතක් ඇත. එනම් සෙනසුරාදා දිනවල රාත්‍රි හතට පමන මෙම බෝධිපූජාව පැවැත්විය යුතුය, ( මෙයට හේතුව සෙනසුරු රාත්‍රියට වඩා බලවත් ග්‍රහයෙක් වීමයි ) මුලින්ම බෝධිය අසල බුලත් කොල 13 තබා ඒ මත පහන් 13ක් පත්තු කරන්න. මුල් පහන් 3 ත්‍රිවිධ රත්නයටය.. එයිනුත් මැද පහන බුදුන්ටය. හතරවන පහන බෝධීන් වහන්සේටය ඉතිරි පහන් නවය නවග්‍රහයින්ටය.. පහන් සමග නිල් හා සුදු මල්ද තබන්න.. නවග්‍රහයින්ට තැබූ පහන් වල පඬුරුද තබන්න. මෙම පහන් පුජාව කර බෝධිය නහවන්නට පටන් ගන්න.. බෝධිය වටේ සත් වටයක් දක්ෂිනාවර්ථව පැදකුනු කරමින් සත්වරක් බෝධිය නහවන්න... ඉන්පසු මෛත්‍රී භාවනාව කර ශාසනාරක්ශක දෙවියන්ට හා විශ්නු දෙවියන්ටපින් පමුනුවා සෙනසුරු අපලයෙන් මිදීමට පිහිට පතන්න.

04. විශේෂ සෙනසුරු පූජාව
සෙනසුරාදා දින 9ක් ඉහත සඳහන් කපුටු දානය හා බෝධි පූජාව පවත්වා අවසන් සෙනසුරාදා මෙම පූජාව පැවැත්විය යුතුය.
ගිතෙල් මිශ්‍ර කිරිබත් ගුලි 9ක්,හකුරු ( උක් හකුරු විය යුතුය ), පලතුරු (නෙල්ලිද ඇතුලුව ) තැඹිලි ගෙඩියක්, නිල් පැහැ මල් සහිත පූජා වට්ටියක් සකස් කර සුවඳ දුම් අල්ලමින් ශනි දේවාලයක හෝ නුග රුකක් පාමුල පුජාව කරන්න.. 
පහත ගාථාව කියමින් පුජාව කරන්න

වරුන දිසාධිපති ශනි රාජා වෘක්‍ෂ නුගෙ

  නීලමාණික්‍ය විමානේ වාහනේ ගරුඩං

  යුතං ශනිවරං නීල වර්ණව භෝජනම්

  නිත්තෙන් මම නමදිම් මුදුන් දී වදිම්

  නීලංග රාජා නමෝ නමෝ ..///

05. මහලු කොර හා අභාදිත හිඟන්නන්ට දාන දීම (කැකුලු සහලින් බත් පිස ගන්න ).
 සංඝයා වහන්සේලාට දෙන දානය පින් වැඩි වුවත් සෙනසුරුගේ අපලයට වඩා සාර්ථක වන්නේ මහලු අභාදිත අයට දෙන දානයන්ය.. 

06. යන්ත්‍රයක් පැලඳීම
 නීල මණ්ඩලය,ශනි මෘතුංජය,විශ්ණු ආඝෝරය යන්ත්‍ර වලින් අපලයට ගැලපෙන යන්ත්‍රයක් පැලඳීම. 2300 වරක්වත් අවම වශයෙන් ජීවම් කල යුතුය.

07. නුග වෘක්‍ෂයට සාත්තු කිරීම,ස්පර්ශ කිරීම හා සෙවනේ සිටීම.

තමන්ට ඇති අපල තත්වය අනුව ඉහත දැක්වෙන ප්‍රථිකර්ම සිදුකල යුතු අතර.. පවුලේ ජෝතිර්වේදියාගෙන් උපදෙස් ලබාගන්නේ නම් මැනවි.

වෛදික ජ්‍යොතිෂවේදී

෴ධනුෂ්ක අබේරත්න෴

෴නීච බංග රාජ යෝගය෴

ග්‍රහ සංයෝග වලින් ඇති වෙන යෝග සම්බන්දව ලියන ලිපි වලට සාපේක්ෂව වැඩි ප්‍රතිචාර ලැබෙන බව පෙනෙන්නට තියනවා.. ඒක නිසා අදත් යෝගයක් ගැනම ලියන්න හිතුවා... ජ්‍යෝතිෂයේ ඉතා විශාල රාජ යෝග සංක්‍යාවක් සඳහන් වෙනවා මේවායින් එකක් තිබූ පමනින්  රටක පාලකයා වෙන්න බැහැ... පුරාන ඉන්දියාවෙ ගමේ ප්‍රධානියාට ගමේ පොහොසතාට පවා කථා කරලා තියන්නේ රාජා කියලා... ඒක නිසයි ගොඩක් යෝග රාජ යෝග වශයෙන් දැක්වෙන්නේ... කොහොම වෙතත් මේ යෝග වල විශාල බලයක් තිබෙන බව නම් පෙනෙන්නට තියනවා.
දැන් හැරෙමු මාතෘකාවට. 
සාමන්‍යයෙන් නීච බංග රාජයොගය කිව්වම ගොඩක් දෙනා දන්නෙ මේක යෙදෙන එක විදිහක් විතරයි.. 
ඒ තමයි නීච ග්‍රහයෙක් හා උච්ච ග්‍රහයෙක් එක රාශියක සිටීම... නමුත් මේක යෙදෙන තවත් විදි තියනවා
ඒ තමයි
01. නීච ග්‍රහයා තැන්පත්ව ඉන්න රාශියට අධිපති ග්‍රහයාට කේන්ද්‍ර ගතව (එමග්‍රහයා සිටින තැන 1 ලෙස ගෙන ගනන් කල විට 4 7,10 ස්ථානයක ) පෙර කී නීච ග්‍රහයා උච්ච වෙන රාශියට අධිපති ග්‍රහයා සිටීම

02. හඳහනේ නීච ග්‍රහයෙකු හා ස්වක්ශේත්‍ර ග්‍රහයෙකු එකට සිටීනම් හා ඔවුන් සිටින්නෙ හඳහනෙ 1,4,5,7,9,10 යන තැනක නම්ද නීච බංග වේ...

නීච බන්ග වන තවහ් ක්‍රම ඇතත් එවා ඉතා සංකීර්න බැවින් මෙහි නොදමමි.. 

ග්‍රහයන්ගේ උච්ච නීච ස්වාභාව පෙර ලිපියකින් විස්තර කර ඇත අවශ්‍ය වෙතොත් මෙතනින් ගොස් බලන්න..

වෛදික ජ්‍යොතිෂවේදී

෴ධනුෂ්ක අබේරත්න෴

ග්‍රහ දෘෂ්ඨි

මොනවද මේ ග්‍රහ දෘෂ්ඨි? හඳහනක් බලන්න ගියාම නිතර ඇහෙන වචනයක් තමයි මේ ග්‍රහ දෘෂ්ඨි කියන්නේ. ගුරු ගෙන් සුභ දෘෂ්ටියක් වැටිලා තියනවා. රවිගෙන් පාප දෘෂ්ඨියක් වටිලා තියනව, වගේ කතා ඔනෙතරම් අහන්න ලැබෙනවා. මෙහිදී වරාමිහිරයෙහි හා පරාශරයෙහි ග්‍රහ දෘෂ්ඨි පිලිඹඳ දැක්වෙන මත දෙ ආකාර වන අතර, ජොතිශය විශයක් වශයෙන් ඉගෙන ගන්නා කෙනාට මෙය තරමක් ගැටලු කාරී වන බව පෙනෙන්නට තිබෙ (මටද මෙය මුහුන දෙන්නට වූ විශාල අභියෝගයක් විය ). 
පසු කලක හඳහන් පරීක්ශාවත් සමග ලැබුනු අත්දැකීම් හා ගුරුවරුන්ගෙන් ලැබුනු ගුරුහරුකම් පදනම් කරගනිමින් ග්‍රහදෘෂ්ඨි පිලිබඳ අවබෝධයක් ලබා ගතිමි.. පහත දැක්වෙන්නේ ඔබට එය අවබෝධ කරගැනීමට පහසු වෙන සේ සකස් කල වගුවකි (මෙය පෙරදිග භාවිතා වන අකරයට අනුව සකසා ඇත ).
මෙහි කතිර ලකුනින් දැක්වෙන්නේ ඒ ඒ ග්‍රහයා සිටින තැන 1 යැයි සලකා ගනන් කල විට එම ග්‍රහයාට සම්පූර්නයෙන්ම පෙනෙන රාෂීන්ය...
උදා: හඳහනක 4 වෙනි කොටුවේ ශනි සිටී යැයි සිතමු ඒවිට සෙනසුරුට පෙනෙන කොටු මොනවාදැයි බැලීමට සෙනසුරු සිටින කොටුව 1 ලෙස පටන්ගෙන ගනන් කරමු... එවිට 3 ලෙස එන්නේ හඳහනේ 6 වන රාශියයි... එනම් 4 වැන්නේ සිටින සෙනසුරුට 6 වැන්න සම්පුර්නයෙන් පෙනෙන අතර එම කොටුව ඔහුගේ බලපෑමට යටත්ය... 

රාහු හා කේතු සම්භන්ධ මත කීපයකි එයින් එකක් වන්නේ රහු හට 2,5,7,9 යන රාශින් පෙනෙන අතර කේතු හට දෘෂ්ඨි නැති බවයි අනෙක නම් දෙදෙනාටම 8 වැන්න වෙත දෘෂ්ඨි ඇති බවයි.

බටහිර ජෝතිශයේ පෙරදිගමෙන් මහදසා අන්තර් දසා කාල ගනන් නොගන්නා අතර ග්‍රහ දෘශ්ඨි මත පදනම්ව පලාපල බලති.. මෙහිදී ඔවුන් භාවිතා කරන්නේ ග්‍රහයාගෙන් දෘෂ්ඨි වැටෙන අංශක ගනනයි.. එය පහත පරිදිය...

එමග්‍රහයා සිටි තැනින් දෙපැත්තටම මෙම දෘෂ්ඨි සලකේ
ශුභ දෘෂ්ඨි - අංශක 30 60 120
අශුභ දෘෂ්ඨි - අංශක 45 90 135 150 180
මිශ්‍ර දෘෂ්ඨි - අංශක 30 72 108 144
බොහෝ විට ග්‍රහයෙක්ගේ තත්වය ඔහුට දෘෂ්ඨි දෙන ග්‍රහයා නිසා සම්පූර්නයෙන්ම වෙනස් වන අවස්ථා අප දැක ඇත. එමනිසා පලාපල කීමේදි ග්‍රහ දෘශ්ඨි වගකීමෙන් යුක්තව පරික්ශා කිරීම වටී.

෴ ත්‍රික අධිපතියන් එම භාවයන්ගේ සිටීමෙන් යෙදෙන යෝග ෴

ත්‍රික යනුවෙන් ජෝතිෂයේ හ්ඳුන්වන්නේ 6,8,12 යන ස්ථාන 3යි... මේ එක් එක් භාව අධිපතියන් ඒ භවයේම සිටීමෙන් ඉතාමත් බලවත් යෝගයන් තුනක් යෙදෙනවා ඒවා පහත ලෙස විස්තර කල හැකියි..

හර්ෂ යෝගය
6 වැන්නාධිපති 6 වැන්නේම සිටීමෙන් මෙම යෝගය යෙදෙන අතර මෙම යෝගය ජන්ම පත්‍රයේ ඇති ජන්මීන් ඉතා ශක්තිමත්, බලවත් නීරෝගී හා දරුවන්ගෙන් සැනසීම ලබන්නන් වෙන බව සඳහන් වෙනවා.

සරලා යෝගය
8 වන භාවස්ථානාධිපතියා 8 වැන්නේම සිටීමෙන් මෙම යෝගය යෙදෙනවා. මෙම යොගයෙන් උපන් තැනැත්තා දීර්ඝායුශ විඳින අතර ස්ථීර ප්‍රතිපත්තියක් මත සැපවත් ජීවිතයක් ගතකරන බව පැරනි පොත් වල සඳහන් වෙනවා.

විමලා යෝගය
12 වැන්නාධිපතියා 12 වැන්නේ සිටීමෙන් මෙම යෝගය යෙදේ. මෙම යෝගයෙන් උපන් අය සකසුරුවම්, ඇනුන්ට උදව් කරන, නිදහස් මත ඇති අය වන අතර විමලා යෝගය නායකත්වයට පත්කරවන යොගයක් බව සඳහන්.

සදුගෙන් දෙපස රාශිවල ග්‍රහ පිහිටීම අනුව යෙදෙන සුභ අසුභ යෝග

1) සුනඵා යෝගය
යෙදන ආකාරය
රවි,රාහු,කේතු හැර වෙනත් ග්‍රහයකු සදුගෙන් දෙවැන්නේ පිහිටීමයි.
විපාක
සදුගෙන් දෙකේ කුජ නම් බලවත් එඩිතර අයෙකි.නපුරුය.වහා කිපෙන සුළුය.බිය නැත.ධනවත්ය.
සදුගෙන් දෙවැන්නේ බුධ නම් කළාකාමීය,ධර්මධරය නීතිධරය අනුන් කථාවෙන් අවනත කර ගත හැකි බුද්ධිමතෙකි.
සදුගෙන් දෙවැන්නේ ගුරුනම් සෑම අංශයකින්ම දැනුම ඇත්තෙකි. කීර්තිමත්ය. සමෘද්ධිමත්ය. ප්‍රධ්නියෙකි. 
සදුගෙන් දෙවැන්නේ සිකුරු නම් ඉඩකඩම් ඇත්තෙකි. වික්‍රමාන්විතය ශූර වීර අයෙකි. ධනවතෙකි.
සදුගෙන් දෙකේ ශනි නම් සැමගෙන් ගරු බුහුමන් සැලකිලි ලබන්නෙකි.ධනවත්ය.බුද්ධිමත්ය.
2) අනඵා යෝගය
යෙදන ආකාරය
රවි,රාහු කේතු හැර වෙනත් ග්‍රහයකු සදුගෙන් දොලොස්වැන්නේ පිහිටීමයි.
විපාක
සදුගෙන් දොලහේ කුජ නම් අහංකාර රණකාමී අයෙකි.නිර්භීතය,කෝප ගනී.කැරලි නායකයෙකු වන්නට ඉඩ තිබේ.
සදුගෙන් දෙලහේ බුධ නම් කලා,සාහිත්‍ය හැකියාවන් ඇත.කතාවෙහි දක්‍ෂවේ.උගත්ය.ප්‍රසිද්ධය, රාජ ගෞරව ලබයි.
සදුගෙන් දෙලොස් වැන්නේ ගුරු නම් රාජ්‍ය ගෞරව ලබන බුද්ධිමත්ව උනන්දුවෙන් කටයුතු කරනඅවංක බව නිසා අනුන්ගෙන් ගෞරව ලබන ධනවත් අයෙකි.
සදුගෙන් දොලහේ සිකුරු නම් තරුණ ලදුන්ගේ සිත් ගන්නෙකි.පභු සම්පත් හිමියෙකි.
සදුගෙන් දොලොස් වැන්නේ ශනි නම් පිනට ලැදි නායකයෙකි.වචනයට බොහෝ දෙනා ප්‍රිය කරයි.අයහපත් ස්ත්‍රියකට සම්බන්ධ විය හැකි බව කියයි.
3) ධුරාධුර යෝගය
යෙදන ආකාරය 
සදුගෙන් දෙපස රාශිවල රවි,රාහු කේතු හැර අන්‍ය ග්‍රහයන් සිටීම
විපාක
නිසිකලට විවාහය,රැකියාව ධනය දියුණුව සැලසීම,විශ්වාසදායි දැසි දසුන් ලබන අයෙකි.
4) කේමද්‍රැම යෝගය 
යෙදන ආකාරය 
සදුගෙන් දෙපස රාශිවල කිසිදු ග්‍රහයකු නොමැති වීමයි.(රවි රාහු කේතු ගනන් නොගැනේ)
විපාක
දිළිදුවේ.දුක්ඛිත දිවියකි.විවාහය දරුවන් මෙන්ම ධන සම්පතද හීනය.තම උපන් බිමන් පිටමං කරවයි.අනුන්ට බැලමෙහෙවර කරමින් කල්ගත කිරීමට සිදුවේ.අපවිත්‍ර අශේභණ ගති සිරිත් ඇත.නැනවතුන්ට සිල්වතුන්ට අපහාස කරයි.හොර මැර වංචා කපටිකම් කරන්නෙකි.
චන්ද්‍රයාගෙන් කේන්ද්‍රගත රාශියක වැඩි ග්‍රහයන් සිටීම, ලග්නයෙන් කේන්ද්‍රස්ථානයක(4 වැන්න විශේෂයි.) වැඩි ග්‍රහයන් ප්‍රමාණයක් පිහිටීම කේමද්‍රැම යෝගයේ අසුභ ඵල හීන කරවයි

කාල සර්ප යෝගය...

මොකක්ද මේ කාලසර්ප යෝගය? නම අහනකොට නම් ටිකක් ගැස්සිලා යනවා නේද? රූපවාහිනියෙත් අනෙකුත් ජෝතිශ්‍යය ගැන කතාකරන තැන් වලත් සෙනසුරු ඒරාශ්ටකයක් තරම්ම බරපතල විදිහට කථා කරන නිසා ගොඩක් දෙනා මේකට හරි බයයි..
"කාල" කියන්නේ ඉන්දියානු භාශාවකින් රාහු ග්‍රහයාට කියන තවත් නමක් "සර්ප" කියන්නේ කේතුට කියන තවත් නමක්. ඒ කියන්නේ "කාල සර්ප" යෝගය කියන්නේ රාහු කේතු යෝගය කියන එකම තමයි..
මෙහි ප්‍රතිපල වන්නේ
විවාහයට බාධා ඇති කරන හා විවාහය දෝෂ අඩුපාඩු සහිතව සිදුකරන විවාහය බිද දමන යෝගයක් ලෙස දක්වා ඇති නිසා විවාහ පරීක්‍ෂාවේදී කාල සර්ප යෝගය සහිත කේන්ද්‍ර වලට කාල සර්ප යෝගය ඇති කේන්ද්‍ර ගැලපීම වඩාත් සුදුසුය. 
කාල සර්ප යෝගය පිහිටන තැනැත්තාගේ දියුනුව තත්ත්වය කලින් කලට උස් පහත් වෙමින් රැල්ලක් ආකාරයට ඇති වන බවත් දියුණුවේ හිණිපෙත්තට ලගා වීමක් නැති බවටත් එක් අංශයකින් උසස් දියුණුවක් ලදත් ඊට අනුරූපව තවත් අංශයකින් කඩා වැටීමක් ඇතිවන බවටත් මතයක් ඇත.
කොහොමද මේක යෙදෙන්නේ?
රාහුගේ සිට කේතු දක්වා ඇති අංශක 180 ක දුර ප්‍රමානය අතර කිසිම ග්‍රහයෙක් ( යුරේනස් නැප්චූන් හා ප්ලූටෝ හැර ) තැම්පත් නොවීම මේ යෝගයයි...
උදාහරනයක් ලෙස රාහු 2 කොටුවේත් කෙතු 8 කොටුවේත් සිටිනවායැයි සිතමු... එවිට අනෙක් සියලූම ග්‍රහයන් 3 4 5 6 7 යන කොටුවල සිටීනම් හෝ 9 10 11 12 1 කොටුවල සිටීනම් මෙම යොගය යෙදේ.. ( 2 හා 8 කොටු වල රාහු හා කේතුට අමතරව වෙනත් ග්‍රහයන් සිටීනම් එම ග්‍රහයන් අනෙක් ග්‍රහයන් සිටින අංශක 180 තුලම නම් මෙම යෝගය පවතී) 
විශේශ සටහන්
රාහුගේ සිට කේතු දක්වා දක්ශිනාවර්ථව ග්‍රහයන් පිහිටීමට වඩා වාමාවර්ථව ග්‍රහයන් පිහිටීම අසුභය...

අත්දැකීම් 1

ඊයේ මගේ නිවසට මාගෙන් නිතරම ජෝතිශ්‍ය වැඩ කර ගැනීමට පැමිනෙන කාන්තාවක් පැමිනියාය... 
"අපේ දුවට දරුවෙක් හම්බවුනා හඳහන හදාගන්න කියලයි ආවේ..."
ගෑනු දරුවෙක් ද? කියා මා ඇසුවෙ මා ඇතුලු මා දන්න හැමෝටම මේ දින වල තොග පිටින්ම ලැබුනේ ගෑනු දරුවන් වීම නිසාය..
ඔව්නේ, හරියටම එහෙම කිව්වේ කොහොමද? 
ඇය පුදුමයෙන් මෙන් ඇසුවාය
ඇය මගෙන් බලාපොරොත්තු වන්නට ඇත්තේ මා යම්කිසි බලයකින් එසෙ කල බව පැවසීම විය හැක..
මේ දවස් වල ගොඩක් ඉපදෙන්නේ ගෑනු ලමයි නිසයි ඇහුවේ යැයි මම කීවෙමි.(තත් කාලයෙන් කේන්ද්‍රයක් සෑදිමෙන්ද, දරුවගේ කේන්ද්‍රයේ ග්‍රහ පිහිටීම බැලීමෙන්ද මෙය ටක්කෙටම කිව හැකි නමුත් එවෙලේ නම් මා ඇසුවෙ නිකමට මෙනි )..
මෙවැනි සිද්දියක් සිදු වූ විට ලකුනු දාගැනීමට කැමති සමහරු නම් තමා සතු බලයකින් එසෙ කල බව කියා කීයක් හෝ වැඩිපුර අයකරගැනීමට පෙලඹෙන බව නම් නොරහසකි
ඇගේ මුහුන වෙනස් වුනේ, ඒ ඇය බලාපොරොත්තු වූ පිලිතුර නොවන නිසා විය හැක

එමෙන්ම උපන් වෙලාව කියූ විට ලග්නය කුමක්දැයි ක්ෂනිකව පැවසීම උගත් ජොතිර්වේදියාට කජු කනවා වැනි වැඩකි.. මීට කලකට ඉහත තාරකා වලින් පාර කියන වැඩසටහනක මෙවැනි මැජික් පෙන්නුවා මතක ඇත.. නමුත් එවා අත්භූත හැකියාවන් නොව ශාස්ත්‍රයේ ඇති සරල මූලික දේවල්ය

නමුත් නියම ජොතිශය යනු ලග්න, නවාංශක, හෝරා, ද්‍රේශ්කාන, ද්වදශාංශක හා ත්‍රිශාංශක යන කෙන්ද්‍ර 6 ම පිරික්සා පලාපල කීමයි... නමුත් අවාසනාවකට දැන් දැන් ලග්නය සහිත භාව කෙන්ද්‍රය පමනක් පරික්ශා කරන ශස්ත්‍රය බාගෙට ඉගෙනගත් ජොතීර් වේදීන් නිසා නියම ශාස්ත්‍රය අභාවයට යමින් පවති... දැන් දැන් කේන්ද්‍රය සෑදීමේදි නවාංශකය හා ලග්නය සහිත භාව කේන්ද්‍රය පමනක් සාදයි... නමුත් ලග්නයේ සියුම් දේ විස්තර වන්නේ ඉහත සඳහන් කල පරිදි සියල්ලම පරික්ශා කල විටය...

ජෝතිශය යනු මැජික් නොව ගණිත ක්‍රම හරහා ග්‍රහ වස්තුන්ගේ පිහිටීම් බලා ඒ ඒ ග්‍රහවස්තුන් තම තමන්ගේ ජීවිත වලට බල පාන ආකරය පැහැදිලි කරන විද්‍යාවකි.. 

ග්‍රහ යන්ගේ උච්ච නීච ස්වාභාව

*රාහු හා කේතු කන්‍යා හා මීන රාශි වල ස්වක්ෂේත්‍ර වුවත් රාහු හා කේතුට එම රාශි අදිපති කම නොලැබේ

කන්‍යා රාශිය අයිති වන්නේ බුධ ග්‍රහයාටය...

මිත්‍ර උච්ච හා ස්වක්ශේත්‍ර ( තමන්ට අයිති රාශිය ) පිලිවලින් සුභ පල වඩිපුරත් සම නීච හා සතුරු පිලිවලින් අසුභ පල වැඩිපුරත් දෙනු ලැබේ.. 

...අරමුන...

කුම්බ ලග්නෙට මේ දවස් කොහොමද? බුධ මහ දසාව ගෙවෙන අයට මේ දවස් වල ලොතරැයි වාසනාව තියනවා කියන්නේ ඇත්තද? වෘශභ ලග්න කාරයෝ පිට ඔපේ ගැනම හිතනවා කියන්නේ ඇත්තද? මේ ජෝතිශ්‍යය සම්බන්දව කතා කරන තැන්වලදී මට ඉඳහිට කන වැකුනු දේවල්ය... මේවාට සෑම විටකම වාගේ කුමක් හෝ පිලිතුරක් ද නිසැකවම ලැබේ... සමහර විට හරි යන මෙම පිලිතුර සමහර විට හොඳටම වරදින අවස්ථාද ඇත...
දැන් අපි මෙවැන්නක් සලකා බලමු..
කොළඹ කෙල්ලන් මොන වගේද?ටයිට් ජීන්ස් අඳින, නයිට් ක්ලබ් යන, සුරා පානය කරන, ඉගෙන ගැනීමට බැරි යැයි කෙනෙක්ට කිව හැක... තවත් අයෙක් මුලු දවසම පන්සලේ සිටින,නිතරම සුදුවතින් සැරසී සිටින බ්‍රහ්මචාරි දිවියක් ගත කිරීමට වඩා කැමැති පරාර්ථකාමි අය යැයි කීමටද පුලුවන.. තවත් කෙනෙක් අධ්‍යාපනයට ඉතාම ලැදි අනුන්ට වල කපා හෝ තමාගේ අධ්‍යාපන අරමුනු ඉටු කර ගැනීමට කැමති අය යැයි කිව හැක... මේ තුන් කොටසම කොළඹ ජීවත් වෙන බව හොඳින් සමාජය දෙස බැලූ කල ඔබට පෙනේවි...දැන් අපි මුලින්ම ඇසූ ප්‍රශ්නය දෙස බලමුකුම්බ රාශිය යනු කුමක්දැයි බලමු පෘථිවියේ වට ප්‍රමානය හැතැප්ම 25000ක් පමන වේ. සෙනසුරු ග්‍රහයාට ඇති දුර ආසන්න වශයෙන් හැතැප්ම 80000000 පමන වේ. පෘථිවියේ සිට මෙම දුර අරය වශයෙන් ගෙන ගෙන ප්වුමක් ඇන්දොත් එහි ප්‍රමානය හැතැප්ම 5000000000 (පන්සිය කෝටියක් පමන වේ එවිට කුම්බ රාශියේ ප්‍රමානය ආසන්න වශයෙන් පෘථිවි පෘශ්ඨය ආසන්නයෙදී හැතැප්ම 2000 කට ආසන්න පමානයක් (25000/12) සෙනසුරු ග්‍රහයා ආසන්නයේදි හැතැප්ම 400000000 (හතලිස් කෝටියක්) ප්‍රමානයක් (5000000000/12) ද වෙයි... කොළඹ වැනි කුඩා ප්‍රදේශයකත් ගෑනු ලමුන් පමනක් සැලකූ විට නිවැරදි තනි පිලිත්‍රක් නැත්තා සේ ඉරිදා පත්තරේ මේ රාශි 12 ගැන කියන තොරතුරු නිවැරදි වීමට ඇති සම්භාවිතාව කොපමනක් දැයි ඔබට දැන් වැටහෙනවා ඇත.. පත්තරේ තමන්ගේ ලග්නයට හොඳයැයි කියා තිබුනත් ත්මාට එම සතිය අන්තිම නරක එකක් වීම නිසා ජොතිශ්‍යය පිලිබඳව ඇති විශ්වාසය බිඳගත් අය මට හමුවී ඇත... එම නිසා යමක් ප්‍රතික්ෂේප කිරීමට ප්‍රථම ඒ පිලිඹඳව වැඩි දුර අධ්‍යයනය කිරීම මැනවයි මා සිතමි... ජෝතිශ්‍යය පිලිඹඳ උනන්දුවක් ඇති ඔබට සැලකිය යුතු දැනුමක් ලබාදීමේ අරමුනෙන් මට ඉඩ ලැබෙන සෑම විටකම මෙම බ්ලොග් එක හරහා මාගේ දැනුම බෙදා දීමටද ඔබේ ගැටලු වලට හැකිතාක් පිලිතුරු ලබා දීමටද තීරනය කලෙමි කැමැත්තෙමි...